ឱតារាខ្មែរនិងអ្នកល្បី

មេត្តាប្រណីដល់សង្គម

កុំយកទឹកស្រាធ្វើជាធំ

ផ្សព្វផ្សាយគួបផ្សំពង្វក់ក្មេង។

អ្នកបានប្រាក់ខែពេញហោប៉ៅ

តែរាស្ត្រហ្មងសៅព្រោះវង្វេង

គ្រោះថ្នាក់បុកប៉ះស្លាប់ចាស់ក្មេង

សូរយំសំឡេងពេញដងផ្លូវ។

អួតរាង cute cuteលើកកែវស្រា

ពង្វក់នេត្រាក្មេងឥឡូវ

ភ្លេចការសិក្សាវង្វេងផ្លូវ

អនាគតត្រូវលិចលង់សូន្យ។

ធ្វើមាតិកាខ្វះសីលធម៌

សង្គមវឹកវរព្រាត់បងប្អូន

គំរូអាក្រក់បន្សល់កូន

វប្បធម៌សាបសូន្យព្រោះចំណេញ។

សូមឈប់ផ្សព្វផ្សាយលក់ទឹកស្រា

ដើម្បីដុល្លារមកបំពេញ

សេចក្តីសុខខ្លួនតែលក់ចេញ

នាំជាតិទោម្នេញខ្វះសីលធម៌។

ងាកមកបង្កើតអ្វីដែលថ្មី

កុំលក់សិរីបំផ្លាញធម៌

ផ្តើមផ្សាយចំណេះជាអំណរ

សង្គមត្រេកអរស្ញប់ស្ញែងអ្នក។

លុយចាយមិនយូរក៏គង់អស់

តែកេរ្តិ៍ឈ្មោះស្រស់តម្លៃម្នាក់

សូមឈប់ពង្វក់នាំក្មេងធ្លាក់

សង្គមត្រជាក់ជាតិរុងរឿង។